Loginរាជធានីភ្នំពេញ ៖ គ ណបក្សសង្គ្រោះជាតិ គ្រោងធ្វើមហាបាតុកម្មជាលើកទី៤ ដែលមានទ្រង់ទ្រាយធំជាងមុន និងធ្វើនៅទូទាំងប្រទេស ចំថ្ងៃបុណ្យសិទ្ធិមនុស្សអន្តរជាតិ ថ្ងៃទី១០ ខែធ្នូ ឆ្នាំ២០១៣ ដើម្បីបន្តការទាមទាររកយុត្តិធម៌ ជុំវិញការបោះឆ្នោតនិងវែកមុខឃាតករពិតចំពោះករណី ប្រើហិង្សាបង្ក្រាបបាតុករ បណ្តាលឲ្យប្រជាពលរដ្ឋ ស្លាប់និងរងរបួស នៅស្ពានស្ទឹងមានជ័យ។
លោក កឹម សុខា អនុប្រធានគណបក្ស សង្គ្រោះជាតិ បានឲ្យដឹងថា
មហាបាតុកម្មនៅថ្ងៃទី១០ធ្នូ នឹងត្រូវរៀបចំឡើង
ក្នុងទ្រង់ទ្រាយធំនៅទូទាំងប្រទេស ស្របនឹងទិវាសិទ្ធិមនុស្ស
ដើម្បីបង្ហាញពីសិទ្ធិ របស់ប្រជាពលរដ្ឋជាម្ចាស់ឆ្នោត
ទាមទារស្វែងរកការពិត និងដោះស្រាយភាព មិនប្រក្រតីនៃការបោះឆ្នោត។
លោក កឹម សុខា បានបន្តថា មហាបាតុកម្មលើកទី៤ ក៏នឹងទាមទារឲ្យមាន
ការស្វែងរកជនដៃដល់ បាញ់សម្លាប់ប្រជាពលរដ្ឋ
ករណីប៉ះទង្គិចគ្នារវាងសមត្ថកិច្ច និងកម្មកររោងចក្រ អេសអិល
នៅស្ពានស្ទឹងមានជ័យ កាលពីព្រឹកថ្ងៃទី១២ ខែវិច្ឆិកា រួមនឹងការទាមទារ
ឲ្យអ្នកកាន់អំណាច បញ្ឈប់សកម្មភាព ប្រើហិង្សាលើប្រជាពលរដ្ឋផងដែរ។
លោក កឹម សុខា បានពន្យល់ទៀតថា គណបក្សមិនទាន់សម្រេចថា
នឹងមានការដង្ហែក្បួន យកញត្តិស្នាមមេដៃពលរដ្ឋ ដាក់ទៅការិយាល័យ
ឧត្តមស្នងការអង្គការ សហប្រជាជាតិ ទទួលបន្ទុកសិទ្ធិមនុស្សនៅកម្ពុជា
ឬយ៉ាងណានោះទេ។ គណបក្សសង្គ្រោះជាតិ បានព្រមានថា នឹងឈប់ចរចាជាមួយ
គណបក្សកាន់អំណាច ប្រសិនបើគណបក្សនេះ មិនទទួលយកលក្ខខណ្ឌ
នៃកិច្ចចរចារបស់ខ្លួន។ ជារៀងរាល់ឆ្នាំ ក្នុងទិវាសិទ្ធិមនុស្ស ១០ធ្នូ
អង្គការសង្គមស៊ីវិល និងសហជីព ដែលធ្វើការលើវិស័យ
សិទ្ធិមនុស្សនិងច្បាប់ តែងជួបជុំគ្នា ប្រារព្ធទិវាអន្តរជាតិនេះ៕
ប្រភព៖វត្តភ្នំ
